..

Mimbung Press Tour
(PNC President-pu in Mimbung Hong Lak)
– J. Thang Lian Pau | 2004

Hun sawtpi pek pana ka muhnop gige leh phak loh pelmawha ka ngaihsut, Mimbung vangkhua pen kha masa in pai theihna hun lem hong om thei ahih manin lawp takin ka kithawi hi. May 14 zingsangin Mimbung, Evangelical Baptist Convention(EBC) biakinn hon pawi siim dinga pai Aizawl EBC Khangno (Baptist Youth Fellowship) Lapawlte hire, MST bus MZ 01-5013 ah kihen in, PNC President Pu Muana Hangshing nung ka zui hi.

Lia leh taangte tawh
BYF’ lapawlte pen Aizawl EBC Chairman Upa L. Lalzik, BYF Chairman Pu Thanglianmang Guite, BYF Secretary Tg. Khumsangmuante in makaih in, driver, Pu Buanga cih loh Zomi vive kihi a, kigualnuam mahmah hi. BYF liapaal Mamuan, Ngairomawi leh Zolawkta cover girl Tluangi-te zong kihel thei uh hi.

Mimbung koi tak?
Champhai District, Ngopa Sub-Division huam, Ngopa pan suahlam Mizorama mualsang pen nihna Lengteng vum omna Sialkal tangdung, maal tawpa om Mimbung khua pen Aizawl pan km. 244 in gamla hi. Kawlkulh tan Champhai tawh, Ngopa tan Lamka tawh lampi kitaang in, Ngopa leh Mimbung kikal lampi pen kum 13 sung kisial, 1994 kuma kihong hi a, kipuah nawn lo hiam, gina nawn lo ahih manin nai 14 sung pawl tak kitai hi. Aizawl pan Nilaini leh Ninoni simin kumpi bus tai a, mawtaw sap Rs. 130 bei hi.

Lambaanna Teikhang
Nitaak nai 6 pawlin Teikhang tung in, khua veelnopna leh PNC vaite hangin president-pu tawh ka tuahsan uh hi. Pu Liankapthang (PNC, Teikhang Unit President) in zan-ann hong vaak in, hong neekngaih mahmah hi. Pu Liankapthang pen Aizawlah ka muhmuh ngei hi napi, ka haih kha hi. Zan pen Pu Khai Khansuan(PNC Hqrs. Secretary) innah giak in, lupmun lah nuam, gim lah kigim ahih manin ihmut lim mahmah hi.

Inn 230 omna Teikhang khua-ah EBC, Salvation leh Presbyterian sap-tuamte om a, EBC tam belin innkuan 130 pawl pha hi. Khawdang bang loin Young Paite Associaiton(YPA) leh YMA om thuap hi. Kumpi zum lamah High School leh Health Sub-Centre ciang om hi. Khawmun nuamin khaw laizang kom hi.

Pu Dal Kam, minam makai
May 15, zing tuungin Pu Kampau (Health Worker, Kawlbem) mawtaw zang in, president-pu tawh ka nihun Mimbung ka zuan uh hi. Teikhang leh Mimbung kikala om Hiangmun khuaah lam baangin Pu Dal Kam innah ka lut uh a, mawtaw lampi ngeia om a hihna tawh Zolawkta agent dingin ka kici uh hi. Pu Dal Kam pen Mizorama Zomite a makai den khat hi in, Pu Khan Chinte hun lai pan kipan kipawlna teng phutte lakah kihel toto hi.

Inn 100 pawl omna Hiangmun pen khaw khung mawtaw lampi beela om to teng tawh km 1 hiamin kihal in, veng nih kisuah uh hi. Tungzang pau a zang khua hi uh a, ZBC, EBC leh Presbyterian pawlpite om in, kumpi lamah M/S sang ciang om hih tuak hi. Teikhang leh Mimbung tawh km 5 hiam khawngin kihalpih tuak hi.

Mimbung mu ta’ng
Hiangmun pan ka tai kik uh a, sawt loin Mimbung kigal muh pah hi. A gal pan a panglang bek kimu thei in, EBC biakinn in mit la mahmah hi. A khua pen nisuahna lamin nga in, Mualpangah om a, Kawlgam sung Tongciin leh Suangbem khuate tawh kimaingat hi. Mimbung pen Kawlgam, Manipur leh Mizoram kigina kiangah om, khua nawl pen hi a, Kawlgam gamgi km 5 bekin gamla hi.

Mizoramah khawbuah lua omlo
Teikhang hi in, Hiangmun leh Mimbung hi ta leh ka ummawh sangin na thupi in, nuam tek ka sa hi. President-pu in Kawlgam leh Mianipur tawh tehin Mizorama singtang khua i cihte zong a buah lua om lo hi, hong ci hi.

Mimbung khaw tuahcil pen tuma in 1997 kum, Manipur-a Zomi leh Kuki buaina hanga galtaite kiphualna hi in, tun bel innkip loukip hi khin ta hi. Kumpi inn 20 val deuh tawh inn 350 khua in kisim hi. Mihing 2000 pawl teen in, electoral roll-a tuang voter 1200 khawng pha hi. EBC, inn 250 pawl leh Presbyterian Church, inn 50 pawl omna Mimbungah Biakna pawlpi thum Presbyterina Church of India (Reform), om in, tuma in ZBC ding ngei hi. PNC aa kipan Mizoram political party teng li baanah, social organisation-ah Young Mizo Association (YMA) tawh kihuai uh hi. Inn om zah lang phialah kumpina seem a om uh hangin neekzonnapi pen singtang singtaang louneih hi bel a, Kawlgam tawh kigina, Tuisalui dung, zanglei-ah zong pawlkhat in buh ciing hi. Bawng leh sial khawi zong a kingaknapi uh khat hi a,gamsa zong manman thei zel uh hi.

Mimbung tun phet kihah siang in, Biakinn honna-ah kihel dingin ka kithawi pah uh hi. Biakinn thak honna hun zingsang nai 9:30 in Pastor V. Jelkhokai makaihna tawh kipanin local BYF lapawl ten Haleluijah Chorus a sak zawh uh ciang Rev. Dr. Luaichinthang, Exe. Secreatry, EBC in honna, puanlap(Flag) kaihpalhna neiin, vakhu khahkhiatna leh dak satna ten zui hi.

Mimbung EBC Biakinn thak
Mimbung EBC Biakinn pen India gama Zomite Biakinn teng lakah hoih pen leh gol pen nihna dingin kituat hi. A gol pen Lamka lama EBC Biakinn hi in, a mantam pen New Delhi-a EBC Biakinn hi ding hi.

Biakinn thak hon pen Nimit 28.2.1998 ni pan kipanin kum 6 leh ni 45 sung kilam hi. A dung 90ft, a vai 40ft leh a sanna 47ft hi in, a lamna in sum Rs. 11,80,967.20 leh tha 12,738 bei ta hi. Biakinn lamna-ah nt. 9.12.1999 in innkhum dawn pan kia in Pu Gouzakham in bei lawh hi.

Biakinn hon pawi pen khawkiim khawpaam baanah, Aizawl, Manipur leh Kawlgam pan kisiim hi. Rev. Dr. Luaichinthang, Rev. Dr. G. Khamkam leh Rev. Jamgin(REtd) ten Nipini zan dong kikhelin hunpi zang toto uh a, kikhop sungin khaw tuamtuam baanah pawlpi dang pan numei leh khangno ten lapawl sakna, extempore acting & speech, drama leh special item tuamtuam tawh tai takin kikhop hunte kizang hi. Hih munah Sia Luaichinthang tanute nih, a deuhin a u, Zomi sunga lasiam min dawk thak Lia Florence Niang Sonkim in Mikang leh Zomi pauin phatna la hong sa zelin kikhop thupisak mahmah hi. Lia Florence in New Delhi-a a kahna sangte pan solo leh gamtat hoih lawmman lala in, DD TV ah leh India President teenna innah lasa in hun a zangzang ngei khat ahi hi.

Nitaaklam Biakinn thak aihna in khual leh tual tawh khawzang bupin annkuang ki-umkhawm a, president-pu tawh ko pen Sia Luaichinthang in amah tawh umtuam dingin Pastor quarter-ah hong samin a lim dan tuam zek pah hi. Sial 3 leh vok 2 kigoin annkuang vai tengah Rs. 42620/- bei hi.

Zan giahna pen PWD Inspection Banglow-a a seem Pu Kam Pau in VIP room hong pia a, amah pen YMA, Mimbung branch President zong ahi hi. Giahna leh omna in IB nuam mahmah in, mipi kitangtuam mahmah hi.

Nipini pen kikhop loh sung tengin Mimbung veel leh VCP Pu Dampau Guite, Pu Tun Kho Pum leh Pu Suak Damte tangthu a gelh Pu T. Leivang leh Zolawkta agent dinga seh Lia Ciintate tawh holimna in hun ka zang hi. Nitaak lam VCP lui Pu Thanghulian in annkuang hong bawlsak in, ka vah mahmah hi.

VCP in Mimbung khua kisap leh deih, Governor hiam Mizoram kumpite hiam kianga a tuttut zelte uh pen Champhai-Mimbung road, Kawlkulh-Mimbung road leh Mimbung-Sinzawl (Manipur) road-te sial leh puahphat; Public playground, Electricity L.T. line extension, Tele-communication, Primary Health Centre, Govt. H/S Headmaster, HSLC Examination Centre leh Installation of Security camp cihte bawl leh koih hi, ciin hong hilh hi.

Awlmawhte
Tu kum Mimbung H/S pan class X mi 13 sung pass om lo uh in, veihuai mahmah hi. Hih pen SSPP lam’ malak ding kul hi. Tua ciang, awlmawh kul mahmah leuleu pen Mimbung khua-ah a diakin Presbyterian cih lohin vai thupi khat peuh a neih ciangin power supply ki-cut zel hamtang ciin gengen uh a, Biakinn hon lai takin hong omlo pah takpi hi. Hih pen P&E Deptt. a seem eimi uliante zong malak theih hi kha ding hi. Mikang ten All road leads to Rome a cih bangin khantohna leh thupit nadingin kikawm lampi hoih khat bek hi loin, mun teng tawh neih kul hi. Hi thei leh, Kawlgam sung Cikha khawpi tawh kikal lampi tampi hoih om thei leh phatuam mahmah ding a, Mimbung pen Champhai khua zahin poimawh thei ding hi. Lam khat pan, mawtaw lampi hoih neih pen siatna zong om a, tuma lama gampha mahmah Sialkal tangah mawtaw a lut ciangin singkung teng ki-at in, louma teng tawh tun gam tol mahmah ta hi. Khaw puah dinga kumpite kiangah ngetna-ah gamgi nai a hihna tawh langkhat lam gamte siatna paulam loin, India gam thupitna leh belhtaak zawkzia dawksak nading, cih zang leng picin vai deuh ding hi.

Zomite zia
Zomite, mi nuai-ah a om ngei lote i hih mah bangin, i teenna peuh pen mualte mual, guamte guam dawn ta na hi ham-tang nuam hi. Tua ahih manin Zomite lungsim zong namdangte tawh tehin sang diak a, i kiima State hiam Gam hiam nei minamte zong tung et se tuan loin, kikimpih et in i en khin mang hi. Hih hangin namdang ten zong gen hak hong sak phadiak minam i hi hi. I lungsim tungnunnate ei lakah hi loin namdangte lakah a zat siam sawm ni. Bangteng hi leh Zomite kisappi pen na khempeuh sangin Pasian thumanna leh ei leh ei KILEMNA cih phawk thak ni.

.