SIALKAL i chih pen Mizoram mal-suah (North-East) lam, Champhai District, Ngopa Sub-Division, Ngopa pan suahlama om mual dung min hi a, Sialkaltang zong kichi hi.  Hih mualah Mizorama mualvum sang pen nihna Lengteng om a, feet 7050 in a sang hi.  A mual golna a dunglam 50 km. leh a vailam 15 km. pawl hi a, Sim leh mal zuiin kiphah hi.  A mallam kipatna Manipur leh Mizoram kigina Tuivai lui hi in, a simlam mongah Tualcheng khua a om hi.  Aizawl pan mawtaw lam zuiin 244 Km., huihkhua zuiin 100 Km. khawngin a gamla hi. Tu lai takin hih mual dungah Tualcheng, Pamchung, Khuangphah, Lungphunlian, Lamzawl, Selam, Kawlbem, Teikhang, Hiangmun leh Mimbung khuate a om hi. 

Sialkaltang luah masa pente i pu i pate hi in,  Sialkal chi-a a mual min phuak zong i pu i pate mah ahi hi.  Nidangin hih mual dungah gamsial tam mahmah a, a paina zawi uh lampite gil thei mahmahin, mihing lampi-in zong kimang thei ahih mana sial tamna, sial paina, sial kalna - ‘Sialkal’ a chi uh ahi hi. 

Mizoram State gamgi in huam kha mahleh, Sialkaltang pen i pu i pate' kepbitsa ei aituam gam ahi hi.  British kumpi in hong awp sungin a gam neitu hihna a hong piak ahi hi.  Tua ahih manin i nam makaite in hih i gamah ei-le-ei kivaihawm ding deihin Autonomous District Council ngah nangin pan a na la den uh ahi hi.