TEDIM ZONG CHIN STATE KHUAPI

 - J.  Thang Lian Pau | March 2010

British-te hong khan panin Zogam (Kawlgam lam) phualpi pen a nuaia bangin a hun zuiin kikhel toto hi:-

Zogamah Mikangte hong khan ciangin Thuklai khua-ah phualpi sat masa pen uh hi.  Kum thum khit ciang Thangmual-ah (Thuklai leh Lunmual kikal) tuah to in, a galkap makaipipa uh min (Gen. George Stuart White) tapin ‘Fort White’ sa uh hi.  1892 kuma Zomi pawlkhat in Myook, Tun Win a thah uh ciang galmuang kisa zo lo uh ahih manin Falam khua sat tawmin kituah leuleu uh hi.

I gennoppi pen Tedim zong Chin State khawpi ahih ngei thu hi a, hih thu kua man gen ngei lo uh hi.  Japan Gal sungin Civil vai leh galkap vai-ah Tedim pen Chin Hills phualpi (capital) suak hi. Civil lamah 1943, November kha-in Falam pan Chin Hills District zumpi teng Tedimah kituah hi. Galkap lamah, Tedim phualpi-a a nei Chin Levy-te thuap dingin Imphal lam pan 63^rd Indian Infantry Brigade-te Tedim tung masapen hi. 48^th Infantry Brigade-te a tun beh ciangin Tedim pen 17^th Indian Infantry Division phualpi aikeh Army Zonal Headquarters suak hi. Galkap kivaipuakna-ah galkap tulsawm (10,000) teh Division khat kici hi.  Zogamah Tedim gambeu in en ‘Japan Gal’ i cih Leitung Galpi Nihna thuak kha pen hi.

----------------------