- P.H. Laldawnglian
Mizoram State-a om i Paite nam heutu ten 3rd June 1980 a kipan MPO
(Mizoram Paite Organization) min tawh Paite Recognition ana nget tak
uh, hun hong pai zel a, Mizoram PNC leh Siamsinpawlpi ten i na
sutzop touh uh leh Delhi lama SSPP heutu masa ten Mizorama i Paite
nam in Recognition a neih ngeingei a pawimawhdan thei a, Mizoram
lama PNC leh SSPP heutute na kithuahpihin leh Recognition ngetna-ah
naktaka pan ana lakpih zelzelnate uh leh Mimal tlawmngai tuamtuam i
nam it mi tampite tawh pangkhawm a, i na sepkhawm-na gah uh Paite
Tribe Recognition tunia lawm thei ta-a i om manin kipahhuai i sa a,
hiai tan hawn piitu i Biak Pathian min phat in, Amah thupina i pia
hi.
Recognition i ngetna uh tawh kisaia Delhi lama pan ana kilak dan leh
nnasep dan tangpi i Magazine ua suah ding a SSPP Mizoram heutu ten
ahon nget bang dungzui un huailam pang report tawmkim takin kawn
gelh ding.
Sept.1995 in Mizoram a kipanin Zomi/Paite Students’ Federation (ZPSF)
heutute makaihin Recognition tawh kisai ngaihtuahin hongzin uh a,
amaute huai huna Delhi SSPP President Pu S. Thawnthianlal Ngaihte
leh Secretary Pu P. Khamkhan-thuamte makaihna in naktak a kithuahpih
leh panpihna piak ahi a, Delhi SSPP GBM ah leng thugenna hun piak
ahi uhi. May 1996 in Aizawl khua ah SSPP Delhi a Secretary Pu P.
Khamkhanthuam leh Jt. Secretary Pu P.H.Laldawngliante ZPSF heutu ten
kithuah-pihna leh annkuangumkhawmna hun zatpih ua, Tribe Recognition
ngetna tawh kisai a maban paizel dingdan kikup khawmna leng nei ngal
uhi. Himahleh hiai nungin ZPSF heutu lamte a kipan in Delhi lamah
bangmah bawhzuina ahong neih nawnlouh manun kithuzakzuina leng om
nawnlo suak hi.
Nov. 1996 in Pu Dampau Guite (President PNC/Mz) leh Pu Muana
Hangshing (Gen. Secy. PNC/Mz) te hong zin uh a, Delhi SSPP in na
zintun in, President Pu T. Khamkhansuan innah tunsak ahi uhi. Hiai
hun in President Pu T. Khamkhansuan, Pu (L) Thangkhanpau Guite, leh
Pu P.H. Laldawngliante makaihna in Union Welfare Minister Shri
Ramoowalia leh Union Railway Minister & House Leader (LS) Shri Ram
Vilas Paswan-te kimuhpih leh Memorandum-te piak pih ahi.
Nov. 1997 in Pu Muana Hangshing (President PNC/Mz) leh A. Siama
Hangshing (President, SSPP/Mz) te hong zin nawn uh a, hiai hun in
ahihleh Manipur a kipana galtai Paite mite a dinga ILP order om tawh
kisai khawng lakkhiak dinga ngetna NHRC leh Shri G.K.Pillai, Joint
Secretary, Min. of Home Affairs. kiangah Memorandum piakna President
Pu H.Chinzason, Secretary Pu Siamnunlian Valte leh Pu
P.H.Laldawnglian-te makaihna in kinei hi.
Hiai huna hong zin uh a paidek kuan un Mizoram a kipana Delhi lam
zinzin bang leng thil haksa mahmah ahihmanin Memorandum piak
nailouhte leh maban zel a hiai tawh kisai Delhi lama na bawhzui
zeltu ding Mizoram PNC, SSPP President leh Delhi SSPP President leh
Secretary-te makaihna in Co-Ordination Committee khat bawl khiak ahi
a, hiai Committee min dingin Mizoram Paite Tribe Recognition Demand
Co-Ordination Committee (MPTRDCC) chih ahi a, member dia guante:
1. Pu P.H.Laldawnglian
2. Pu Ginzalala Hauzel
3. Pu K. Ginkhanthang
4. Pu N. Chinzakhup
Amaute makaihna in 1997-1999 sungin hiai a nuaiate-ah Memorandum
piakna leh kansui zelna neih ahi.
1. Shri Indrajit Gupta, Union Home Minister
2. Shri G. K.Pillai, Joint Secretary, Min. of Home Affairs (NE)
3. Chairman, National Commission for SC/ST
4. Chairman, National Commission for Minorities
5. Dr. H.Lallungmuana, MP (Lok Sabha)
Hiai tenga Memorandum khiak banah a vangkima va kanzui gige leng ahi.
20th Feb. 2000 in i Committee ua Co-Ordinator Pu P.H. Laldawnglian
in Delhi SSPP President Pu S. Lalengzauva Ngaihte leh Secretary Pu
T. Thangson kiangah member khenkhat Delhi paisan banga omtak ziak ua
member guanbeh thak dinga ngetna bawl a, a ngetna bangin 4.3.2000 in
Delhi SSPP Meeting-ah Pu P.H. Laldawnglian, Co-ordi-nator kithuahpih
ding, MPTRDCC member a nuaia teng guanbehna kinei hi:
1. Pu Thuama Guite
2. Pu Vanlalruat Tonson
3. Pu S. Thawnthianlal Ngaihte
4. Pu T. Thanghnun
August 2001 in SSPP Delhi khawmpi ah i Co-Oridinator uh Pu
P.H.Laldawnglian SSPP Delhi President dinga telching in hong om a,
huai a kipanin Co-Ordinator mawh-puakna leh file bangkim Pu Thuama
Guite khutah pekhia hi. Himahleh Pu Thuama Guite leh Pu Vanlalruat
Tonson ten a siamsin uh zo a, Delhi a pawtsan dek ziakun Co-Ordinator
hihna Pu Laldawnglian khut mah a hong om nawn hi.
Kum 2000-2002 kikala hiai Committee a na sepzui dan tangpite:
1. A tunga i gente a kal laklakin kansui gige in, Office-ah hawh
zelzel uhi.
2. Shri Jual Oram, Union Tribal Affairs Minister kiangah Memorandum
piakna nei ua, a vangkimin i dinmun uh kan zelzel ahi.
3. 8th Sept 2001 a Delhi SSPP Conference-a Chief Guest dia kizang
Shri Amar Singh, MP. Gen. Secy. Samajwadi Party kiangah Delhi SSPP
President Pu P.H. Laldawnglian leh Secy. Gen. Pu Thangzalun Khuptong
minin Mizorama Paite mite’n Tribe Recognition a nget pen uh ahih
theih bangbanga panpihna hon pe dinga ngetna piak ah , huai ngetna
pen ngai pawimawhin Shri Amar Singh in Memorandum-te Prime Minister
kiangah personal mahmahin pelut a, gen leng hon gensak ngal hi.
4. Mizoram Chief Minister Delhi-a hong zin chiangin a na kimuhpih
zel ahi a, a kinlama recognition muh ahih theihna dia ngetna a na
kinei zel hi.
5. Pu Vanlalzawma MP. (LS) leng kimuhpih ahi a, pan nak taka hon la
dia nget ahi.
6. Shri P.A. Sangma kiangah leng Memandum piak ahi a, hon panpih
dinga leng nget ahi.
7. Oct. 2002 a Delhi SSPP Confenrnce-a Chief Guest Pu Lalhmingliana
MP(RS) kiangah Delhi SSPP President Pu Thangzalun Khuptong in
Recognition tawh kisai ahih theih bangbang hon panpih dingin ngetna
bawl hi.
8. A kal laklakin Pu Holkhomang Haokip, MP(LS) kiangah leng thu dot
leh a panpihna nget zelzel ahi.
A detail lua-in nna sepdan leh Office tuamtuama a kisaidan i gelh
man kei a, hiai office tuamtuam leh Minister tuamtuamte muh/lut
theihna dinga hon na panpih kha eimi hi-in namdang hita leh a min uh
i gen man kei a, amaute tengteng tungah leng i kipak hi.
Hichi banga Ministry leh Dept tuamtuamte-a i Memorandum-te uh a
lutna ding teng a lut kim khit nungin leng va kansui leh nawh deuh
thithe bang a ngai sek a, huchi bang ahih zelzel theihnate-ah leng
hon na awlmawhpih leh hon na panpih a, i nam hon itpih mi tampi tak
kituak kha hi. Amaute min leng i gelh langvek thei kei a, poi i sa.
Huchi banga hih ding teng zawh a hihin June/July 2002 in Tribal
Affairs Ministry panin Tribe Recognition ngente lakah bangzah hiamte
Cabinet in Approval bawlta a, huai lakah Mizorama Paite leng telkha
hi.
o 12th Aug. 2002 in Lok Sabha ah SC/ST Orders (Second Amendment)
Bill 2002 in puaklut in om hi.
o 18th Dec.2002 in Lok Sabha in Bill Passed a, 19th Dec. 2002 in
Rajya Sabha in passed nawn hi.
o 7th Jan.2003 in India President in remsakpihna suaikai ta a, 8th
Jan. 2003 in Notification suak ta hi.
Hiai MPTRDCC in Mizoram lama PNC leh SSPP heutute tawh kithuzaka
nnasem khawm gige a kihi a, kigamla ahihmanin kithuzak manlo-a i nam
adia a hoih tho gintakna ziaka ana sepkhak khenkhat bang leng a om
mai thei a, huchi banga heutute deihlo lam hihkhak leh sepkhak hiam
a om zenzen leh hehpih taka nam itna ziak ahi chi-a ngai a, i
kingaihdam tuah uh deihhuai ka sa uhi.
Huaibanah i nam in Recognition amuh ding deih a, hon na awlmawhpih
mi tamtak a om ua, amin uh i gen vek seng kei a, poi i sa hi. Rajya
Sabha leh Lok Sabha Secretariat-a eimi nasem a omte bang leng i
Recognition ngetna ua hon panpih nak leh a pawimawh penpente ahi uhi.
Huaibanah Recognition uh kipahhuai kisa in, a lawpna Siamsin Pawlpi,
Delhi Branch leh a nuaia Paite Recognition Demand Co-Ordination
Committee joint meeting remsakna bangin 8th Feb. 2003 in JNU
Campus-ah nitaklam daak 3:00PM in Mizorama Paite Recognition lawpna
kikhawp neih ahi (Hiai programme hi SSPP Winter Meet tawh thuah ahi).
Hiai programme zatna a nek leh tak (Refreshment) hi MPRDCC in tum/si
dinga SSPP in a nget bangin MPRDCC in Refreshment man ding mi
kiphalte kiangah nget ahi a, hiai a nuaia ten phal takin hawn thawh
ua, a tung uah i kipak mahmah hi:
1. Pu K. Ginkhanthang - Rs. 500/-
2. Pu N. Chinzakhup - Rs. 500/-
3. Pu N Songchinkhup, MLA - Rs. 500/-
4. Pu Vanlalzawma, MP/LS - Rs. 500/-
5. Pu T. Khamkhansuan, (Ex-President, SSPP(D) - Rs. 200/-
6. Pu Khamchinpau Zou, (President, AITSA(D) - Rs. 100/-
Total Rs. 2300/-
(Hiai summuh Rs. 2300/- (sangnih leh zathum) a vekin SSPP
Refreshment saite kianga piak khiak ahi.)
Hiai Programme a ding tawh kisai a stationeries leh transport a sen
Rs. 380/- (Zathum leh sawmgiat) avekin Co-ordinator, PRDC Pu
P.H.Laldawnglian in seng vek hi. A lawpna-ah MPRDCC Member Pu S.
Thawnthianlal Ngaihte Conductor in pang a, PRDC kibawlkhiak dan
tangpi genna nei hi.
Co-Ordinator Pu P.H.Laldawnglian in Recognition a kinget tunga kipan
a nnasep dan tuamtuamte genna nei a, tu a Recognition i muh theih uh
hi Pathian hawnpizia leh i pankhawmnate uh ziak ahi chih gen a,
Recognition ngetna a tha leh zung, sum leh pai tawh a na pangkha
tengteng kiangah Mizoram Paite mite sik leh tangin kipahthu genna
leng nei ngal hi.
Huaibanah hiai Recognition ngetna ah Mizoram PNC leh SSPP te tawh
kithuzak gige a, a kul bangbanga nna sep ahihdan leng gen hi.
Huaibanah sum leh pai thu a dotna om zeuhzeuh tawh kisai in ahihleh
Mizoram lama kipanin Recognition ngetna a zat ding MPRDCC in Rs.1/-
(Chengkhat) leng muh/dawn ahihlouh dan gen ngal a, mi kiphal
taktakte leh MPRDCC member-te sumte senga bawhzui leh sepzui zel
ahihdan leng gen ngal bawk hi.
Huaizawh in Pu S. Lalengzauva Ngaihte (Ex-President, SSPP[D]) in
thugenna hun zanga, Mizoram Paite History khenkhat leh Lok Sabha
lama i Recognition nget uh tawh kisaia ahih theih bangbanga pan a na
lak dante genna hun nei hi.
Huaikhitin Pu Thangzalun Khuptong (President, SSPP Delhi Branch) in
thugenna hun zanga, hun bangtan hiam a kipana Recognition nget hita
a, kei President hun chet a Recognition i muh uh hi kipahhuai ka sa
tuan mahmah a, Pawlpi a dia achievement thupi tak khat ahih dan gen
hi.
Huaibanah Tangzadou Hangzo (Adou Hangzo, Zionist File gelhpa) in
Recognition neih a pawimawhdan leh a phattuamna tampi tak gen a, tua
Mizorama i Paite nam in Recognition i muh ua kipanin Mizo nam laka
khat i hihdan a taklang mahmah hi. Tun chu Sub Tribe lel i hi nawn
kei ua, Tribe taktak i hihdan a taklang mahmah hi. Hiai tan i tun
theihna ding ua panla khate leh a na kihel kha heutute pahtakhuai a
sakdan leh recognition i muh uh kipahhuai a sak dan gen hi.
Programme teng zawhin Pu T. Chinsum Naulak (Member, Zogam Writer
Group) in Pathian kiangah kipahthu genna nei a, programme zawh ahi.
Programme zawh in mipi paikhawm ten Recognition lawpna nekkhawm leh
dawn khawmna kinei zia zia a, lim kisa thei mahmah hi.
Hiai tengin ka thugelh ka khin ding a, hiai Siamsinpawlpi HQ Mizoram
Magazine hi I nam a ding a khanlawhna tuntu hong hileh chih ka
thumna ahi.
Siamsinpawlpi in masawn zel henla, a khan kumkhua sawt hen!
Theihtuak:
1. Hiai Recognition i ngetna ua Tribal Affairs MInistry, NC for
SC/ST, NC for Minorities leh mun tuamtuam a saina a eimi hilo hon
na panpih khate min gelhlat louh hoih zaw dia gintakna a kineih
manin kigelhlang lo hi.
2. Hiai Report Co-ordinator, MPTRDCC File a kipan a kila ahi
3. A detail a ennuam i om leh hiai thu gelhpa kiangah a et theih
ding a, gelh tuak, gelh kim louh a om khak a kigingta kei a,
himahleh huchi bang a om khak zen zen leh ngaihsiam i kingen ngal
hi'
