KEI ZONG PAITE HI KAI VE

- Maveni Hangzo

Mizorama Paite nam ten, Indian Constitution-a Schedule Tribe Recognition i nget, ngah in, a aihna neih nadingin Celebration Committee phut in, Aizawla i mi i sa teng kiangah sum donna laite i hawm hi.

Nikhat pen, inn khata ka luhna ah a tanu uh na om in, hong lut un, banga na deih uh a cih zawh phet in, ka hawhna hang uh ka hilh pah hi.   Ama’n  Pune-ah M.A kah a hih thu leh a pa’ nam vei dante hong hilh a, ken zong ka pa bangin nam veiin ka it mahmah a, ka omna mun peuhah ka cipih zonkhiat ka sawm tawngtung hi.  Pune ah zong ka om zawh a sawt loin ka kan leh, Manipur pana hong pai, a min leh a pau uh panin thei milmial in, zaktapi mahin Paite na hi uh hiam?  He, hih mah ung, ka lungdam lua in, kei zong Paite hi kai ve, ka cih kik leh pau na thei hiam,  siam lo, Aizawl pana khangkhia leh Paite pau zak ding omlo ahih manin ka thei kei hi, ciin ka dawng hi.  Amau, pau zong thei lo, Paite hi kei ni teh, hong ci se uh hi.  Paite ciik mahmah Kullai beh hi ing, ka cih hangin hong muang thei tuan lo uh ahih manin, lungsim napi in ka pa ka phone hi.  Ka pa’n cih nading thei tuan loin hong nuihsan in, a hai man uh hi, hong ci hi.  Amau lakah ka kitang hel suak zel a, a sawtsawt ciangin kikholh nuam ka kisa vanglak uh hi, cih thute hong hilh hi.

Ka gennop ngei loh ka genkhia kha ta hi.  Sanggam aw, hi hong sa lua ing, ka lungdam lua hi, kei zong nang tuah bang tuak kha zel kai ve, cih kawmin ka tuah khak thute ka genkhia hi.

Shillong, Paite pau kizatna ah om ngei lo ka hih manin, ka naupan laia ka pan in tangthu dana a gen ka ciapteh teng sim loh adang theih ka nei kei hi.  I minampihte muh leh theih a, a lakah kihel ding ka lunggulh mahmah den hi.  Shillong ah ahih leh, Mizo Students Union(MSU), Mara Students Organisation(MSO), Lai Students Association (LSA), Hmar Students Association (HSA) etc.  Hih siamsin kipawlna teng om in, ko pen Lai, Mara, Hmar ka hih loh uh manin Lusei, Mizo pau zang ka hih manin MSU ah ka kihel lel hi.

Mizoram pana kipan, Mizo kici buang, hih nam tuamtuamte in amau aituam nam ciat tawisang nuamin ma lim lak mahmah uh a, MSU bang in awi het loin, cih nading thei tuan sam lo hi.  Namdangte muha Mizo hi khin napi in, Mizoram pua tun tak cianga Mizo hihna suahkhia in, ki-mizo-sak nuam vet lo uh hi.  Ei i hih leh, gamdang, namdang lakah i nam kizumpih hi mai lo hiam?  Gamdang pana hong pai, i mi leh i sa – Paite kici ngam lo leh, pau takpi zang ngam lo, minam zumpih Aizawl zongah gen ding tawmsan lo ding hi.  Hih thute hangin i minam leh i pau mang hiaihiai in, pau thei lote ading kisin nading om hiau loin, tua kawmkalah pau thei lote pen Paite in kisim nuamlo zawlai hi.

Gam tuamtuamah nasem, sumbawl, siamsin khawngin ki-om kawikawi a, kitheih leh kikankhiat ding baih lo hi.  Namdangte pen koi mun peuhah a om uh zongin students level in hiam, welfare society in hiam in kihuaikhawm tangtang uh in, nopna dahna vaite-ah baih takin kivaan zel uh hi.  Namdangte hih bang danin tamin tawm mah ta leng, welfare society phuh pen koi mun koi sanah a hamtanga ngaihsut ding kisam ka sa hi.

A masa lama i gen, Mizo hiang nam tuamtuam ten a nambil tek uh tawisan sawmin mala teitei uh manin, ei, Paite pau thei lo, minam lungtang khauh vevete lungsim na nuam mahmah hi.  MSU khawngah i kihel hangin, nuam kisa thei het lo hi.  (MSU leh MZP cih pen a kibang hi in, Mizo kici ciang teng huap khin zo dinga ngaihsut hi.)  Ka lawmte kiangah, Paite students union hiam, welfare society hiam cih dan kipawlna a om hiam ciin ka dong thei zel hi.  Nak theih loh lua uh hi.  Ka kankan tak ciangin, ka lawm pawlkhat in Paite students union bel om mah veh aw, cih thu hong hong hilh in, tua pen SIAMSIN PAWLPI na hi gige hi.  Kankhiat a, a malak dan khawng ka thei nuam hi.  Ai’zong a min naleng ka lo thei kei hi.  Paite a hih taktak ding uh ka um thei kei hi.  ‘Bang e’ cih natawm theilo ta dingin SSPP cih khiatna pen theih haksapi khat ahi hi.

Tu cianga ka ngaihsutsut ciangin, Paite students union cih hiam khat na hi zaw leh, pau a kithei kei zongin ‘ka cipihte’ ciin lungmuang taka kihel suk theih ziau ding hi a, a dik takin namdangte in zong tel thei lo uh hi.  Paite minam pen thei uh, SSPP cih khiatna a hih leh pau thei lo ten thei lo uh hi.  Namdangte a minam min uh suangin students union phut ciat uh a, pau a theih loh uh hangin, amau leh namdangte mahmah in zong thei thei ziau uh hi.  SSPP Aizawl Branch-ah ka kihel khit ciang zong, ka lawmte leh kumpi official-te, namdang leh eimau sunga pau theilote tung pan dotna kituak mun mahmah hi.  SSPP pen bang cihna, banga a deihna, ciin dotna ka tuak zel hi.  Hilhcian kul thithe hi.

Keimah banga buailawh mi bangzah tak i om tam maw, namdangte kawmkalah thanempi in a kihel zel ka hi a, Paite a hih lam uh ka phawkkhiat khit ciangin a kipawlna sungah lut nuamin ka omna mun peuhah ka kankhia zel hi.  Hong dot masak den uh pen, pau na thei hia, thei lo, Paite ka hih ding um thei lo uh hi.  Pau thei lo ka lawmte pen lungkia in, hong kihepsan mengmeng uh hi.  Kei pen lungkia nuam loin ka cipihte lakah kihel ka ut tentan hi.  Ahi zongin pau ka theih loh manin leh haksatna bangzah hiam khat ka tuah ngei manin lungsim napi-in, kei zong Paite kai ve, ci kawmin ka kihep san hi.  I minam identity sunga lut ka sawm masakna pen a lawhsam tadih phot ka hi hi.

Delhi ah, Jawahar Lal Nehru University (JNU), Godavari hostel ah ka om hi.  Mizoram pana a pai, officer leh students hon khat om hi.  Cooperation hoih tak nei thei uh hi.  Welfare society khawng bulhin nopna dahna vaite-ah lim takin kihuai uh hi.  Aizawla khangkhia ka hih manin Mizo Society ah pen ka kita mahmah hi.  Tua kawmin ka cipihte, muh leh theih ut kinken zel in, namdangte zong dong in, ka nak zon mahmah thei hi.  Mizote danin welfare society khawng phut lo uh aitam aw, ka cici hi.  Keima kizen loh man hiam, a kalsuanzia uh dik zolo hiam, kankhiat haksa thei mahmah hi.  Hih hun lai takin zong SSPP om khin zo hih tuak hi.  Namdang ten thei kha lo uh hi.  Namdang pau, ka theih ngei loh a zang a om ciangin Paite hi dingin tuat in, ka dong pahpah zel hi.  Hong dawn dan uh pan nuihzathuai tam thei mahmah in, ka mai hong zumsak zel hi.  Ka lawm ten lamdang hong sa in, pawlkhat in hong tai in, pawlkhat in hong kinpih  veve sam uh hi.  Paite na cihcih, ko tawh kithuah nuamsa lo na hiam, hong ci zel uh hi.

Ka omna Hostel ngei-ah exercise lain tangval li zingsang simin hong tai zel uh a, a pau uh tuam pian ahih manin nimbu tui dawn kawmin paang in, hong hopih paksai nuam ing, Paite na hi uh hiam, ciin ka dong hi.  Hi lo,  Paite cih thei ngei kei ung, ko bel Zomi hi ung, ciin hong dawng hi.  Nang kua-a na hih, Paite, Zomi za ngei keng, ciin ken zong ka dawng hi.

Zomi leh Paite cih natawmah kibuai, thei dinga i koihte in zong thei lo, Paite sang thei, Zomi sang thei lo cih bangin ki-om bialbual hi.  Hih pen minam vaia ma i lakna-ah a nawngkaipi khat hi mawk hi.  Keimah mahin zong ka buailawh thei zel hi.  Mizoram kumpi in foreigner a nawhkhiat laiin, sanggamte don nuam in, Jail khawngah ka pai hi.  Thongkia tam mahmah hi. Paite na hi hiam ciin a ban a banin dongin, Burmese, Lai, Halkha, Zomi, Paite ciin hong dawng ciat uh hi.  Paite kici ciang teng Jail pan ka pikhia hi.

Numeite dinmun, ei minam sungah niam diak cih ka phawk gige a, kipawlna khat peuhpeuh ah makai hihna tang kha ngei lo phial uh hi.  Lai siam tawm mahmah in, a diakin suahlam sanggamte lakah suuk kaan hi.  Hih pen i khantoh theih lohna khat hi.  Muslim khauhpai pawlte dana numeite i koih niam sung teng kikhangto ngei lo ding hi.  Pasal phak zawh loh ding numei tampi tak a om lam i theih phamawh hi.  USA hatna leh vangliatnate numei vang hi cih i theih kisam hi.  Numei leh pasal liangko kikimna gam hi in, tu ciangin gam tuamtuam in phawk ta uh ahih manin ki-etteh ciat ta hi.  India kumpi nalengin numeite dinmun tawisan sawmin nakpi takin mala a, i theih ciat ding hi.

Aizawlah ZBC, EBC, AG-te hong kiphut in, Paite a hih uh thei in, ka kikhawm zel hi.  Paite paua Pasian biakna muna kikhop pen a dan hong tuam diak a, gelh leh gen khit zawh ding hilo hi.  Khristian biakna sungah namcin, cicin, paucin kita in, kei kua cih hong kitheih loh hangin, tuate in hong buaisak dek lo hi.  La sakkhopte, Lai Siangtho sim cihte pen a bu-in et ding om in, thungetna hong kipat tak ciang bel, Amen hun, a tawp nading cihte thei thei loin, bangzah vei hiam khat Amen ma in hak sim zel in, khatvei leh ka kianga tu ten hong hilh in, zumhuai sim tham hi.  Bible lei ding zong in, Lai Siangtho ka nei ta hi.  Lai Siangtho panin pau sin in, tawmtawm ka thei ta hi.  Tu’n pen Amen hunin zong ka buai nawn sam kei hi.

Sialkal mualdung, Paite gam cia ka zak ngei zel, ka muhnop mahmah, Pasian vang tawh pai thei in, kumpi nasep kawma minam politics gen, bang hih theih nei na hiam, ka malakna uh siasak dinga kumpi zat CID na hi hiam cih khawngin hong kidong in, ken pen kumpi nasep kawmin minam politics sai lau kei ing, nam adingin seem thei ing, danin a phal kei cih ka haih kei hi. Security muna duty, law & order a vaisaite hi ing.  Dotna hong bawlma in, ka thuak ding bang thuak ngei khin zoin, ka omna mun leh ka nasepna mun peuhah minam ading seem thei ka hih lam ka thei hi.  Minam it i hih leh bangmah in hong dal thei lo a,  ei pen kumpi naseem hi in, sumbawl hi in, ka innkuan uh genthei hi cih bang paulam khawng bawl thithe pen minam it khatin ka sang thei kei hi.  I neekzonnate, innkuan sung haksatnate in minam nasep nading hong dal khin mawk leh kua in seem tuan ding a hiam?  Paulam ding neilo kua om ding a hiam.  Kawlbem PNC khoppi pan ahi zongin, Mimbunga ka thugennate pan ahi zongin mi’n hong thei pianpian ta in, Sialkal mualdung ka nutsiat ding tak ciangin bel mittui tawh hong kikha ta sam hi.

Siamsin kipawlna, mimal, saptuam, kipawlna tuamtuam ah, i minam identity sin leh kan ka sawmna-ah dotna lamdangpipi ka tuak mun mahmah a, gen zawh pak ding hilo hi.  Zumhuai ka sa a, ka lungtang na thei mahmah hi ven.  Paite gam, pau kizatna ah ka om ngei loh manin theihnop, sinnop, sepnop, muhnop tampi tak ka neihlam thei lo uh hi.  Malak dan ka siam theihna ahih ding lamen in, tawm kong lakkhia ahi hi.

Israelte in a mangthang a cipihte uh zongin, leitung mun tuamtuam pha uh hi.  Mizoram zongah hong pai zel uh in, a va zonkhiat uh ten Israel ka hi ciin, Leitung mun tuamtuam panin Israel gamah pem khangkhang den zen uh hi.  En bel a lal lamin minam kizong in, muh hak deuh mawk hi.

Namdangte tawh kipumkhat dinga mala a, i vekin Mizo/Zomi hi hang cihcih sangin, eimau sung kipumkhatna dingin malak dan siam zaw leng, namdangte tawh kipumkhat nadinga malak hatsak zaw thei ding hi.  Namdang kawma khangkhia, Paite pau zak ding om lohna, mun tuamtuamah ka om uh hi.  Gam nei lo, pau a bei ciang ngeina guipi khat kikhahsuah suak ahih manin, minam vaia khanglo kisa, a ngei leh a ngei teng sepkhop sangin, i cihpih manthan a kipan leh a mangthang khinsate zongkhia in, a zat siam leng, mai kinawt nawh zaw ding hi.  Paite identity ka theih khit cianga ka veipi pen i minam manthan a kipan leh a mang khinsate hotkhiat leh kipumkhatna hoih neih ding ahi hi.  Mimala sep theih tawm mahmah in, sepkhopna hoih i neih kisam pha mahmah hi.

Pu Dawnga Hauzel s/o PH. Rothuam malakna vang tawh i cihpih Mizoram pana Delhi-a siamsin, Paite pau thei lote zong SSPP ah kizangsak uh cih ka zak ciangin ka lungdam mahmah hi.  Malak dan i siam poimawh mahmah in, i vekpi’ mawhpuak ahi hi.

Minam hanga haksatna ka tuahte ka sut kik ciangin, ka lungkia thei zel hi.  Seppih ding mihoih, minam it, mi diktat leh muanhuai muh ding haksa ka sa hi.  Ahi zongin, kei sanga seem leh thuakna nasia zaw om cih ka theih ciangin ka lung muang in, tha hong pia mahmah hi.  I theihsa tek ahih hangin tawm ka gen nuam lai hi.

Pu Thangzamuan Hauzel, Apex Bank, Managing Director in Aizawl ah hong om in, i mi leh sate ahih theih zahin panpih a, a mel ka muhma in a min ka za hi.  Mizoram vaihawmna sang pen Assembly House session-ah opposition MLA in dotna bawlin, Apex Bank ah, nambil kideihsakna a om hiam ciin question pia giap hi.  Aizawlah sawt lo a om sungin i mi leh sate in hamphatpih mahmah hi.

Pu Clement Lalrem, Engineer, PHE Deptt.-a a sep sung khempeuhin i mi i sate lim huh mahmah hi.  PHE Deptt. pen Paite Deptt. ciin kithangsak liang hi.  Mizorama Paite ten minam a dinga ma i lakna-ah bang hun bang hunin sum leh pai, a pilna leh siamnate siit loin hong kipia zo den hi.  Mizoram bek hi lo, gamdanga i unaute zong mimal leh kipawlna hi ta leh huh a kisam peuh a panpih ngiatngiat-pa ahi hi.  Kumpi mit khamsak mun mahmah ahih manin a suksiat dan ding bekbek hanciam in, Chief Engineer ahih laiin negu-a kigawhin Assembly House Session-ah automatic-a suspend ahi hi.  Tun dong ciangin a nekguk, peek khat zong kimukhia buang lo hi.

Pu Dr H. Thansanga, Education Minister a let laiin, HSLC question leakout vai-ah siamsin khempeuhin lamzuiin Dr H. Thansanga, Education Minister, Paite leltak tawp ta hen, ciin kikokhawm damdam zen uh hi.  Peon khat’ kizen lohna hangin mindai lawh mahmah hi.  Paite hi lo hi leh… hih sanga scandal lian zaw tawm het lo mah hi ven.  Tuni-a Tribe Recognition i lawhcinna pen a ma hang hi a, a bul pana a tawp dong malapa ahi hi.

Pu N. Chingouthang, UBI Manager, Manipur Paite leh Kuki kinat laia i cipih tampi takin inn le lo leh nuntakna taan uh a, minam a it mana a service leh nuntakna in a thuak theih lam thei gigepi-a sih huama ama tha leh sum baanah a neih khempeuh khaama minam adinga kipia, ama hanga sihna tawh kipelh i sanggam bangzah tak a om tam maw.

Leitungah Paite/Zomi minam a om sung teng, i minam adinga a seem, nuntaakna a pia, i minam hanga mindai ngam, muanhuai tak leh citak taka a seem teng pen, Paite minamte in i thei a, i mangngilh ngei kei ding hi.  Pahtawina paakkhi leh zahtaakna cibai lungsim takpi tawh ka suan hi.

Ka hih theih a tawm hangin, ka omna mun leh ka nasepna mun peuah…. KEI ZONG PAITE HI KAI VE vom gige kawmin i minam ading ka nungta den ding hi.