..

MIZORAM PAITE UNION (MPU) FIRST GENERAL ASSEMBLY

 CHAMPHAI MARCH 30 & 31, 2006

PRESIDENT, DR. H.THANSANGA THUSAWI

(PRESIDENTIAL SPEECH)

Pi leh pu, unau, thawhpui duh takte u,

Hnam inkaihhruaina tha zawk kan neih theihna tura rahbi pawimawh tak, Mizoram Paite Union (MPU) inkhawmpui (General Assembly) hmasa ber ngai pawimawha hmun hrang hrang atanga lo kal khawmte, in zain ka lo lawm che u a, chibai ka buk a che u.

Khawvelah hian hnam tam tak a awm a, keini-ho hi eng hnam nge kan niha khawi lai atanga lo chawr chhuak nge kan nih tih hi kan hriat chiana kan nihna, Sapin Identity an tih-ah kan chian a pawimawh.  Hnama chiang inti theuh theuh pawh kan chian dan fuh lo leh kim lo deuh a awm thei . Kan chian dan a fuh loh chuan unau inhmuh thiam loh mai pawh a awl.  Chuvangin, tute nge kan nih tih leh tute nge kan unaute tih hre chianga hnam hmasawnna leh himna tura kan tanrual a ngai a ni.

Father Sangermano lehkhabu, kum 1783-a ziak, kum 1833-a chhutah chuan he thu hi a chuang a: "Chin Hills chhak lam North Latitude 20:30' leh 21:30' inkarah khian hnam lian lo tak ZOU (Jo) an awm" tiin a ziak a.  "Hnam" hran ngat, mahnia ro inrela inenkawl niin a sawi bawk a.  Hnam tih thamin kan lo awm tawh tih a entir a ni.  Chuti a nih chuan 'ZOU' hnam chu tuna 'MIZO/ZOMI' kan tih Zohnahthlak zawng zawng huam kim veka kan ngaih leh kan pawm tlan a lo chhuahna, a bul chu a ni tih hi a rinhlelhawm lo.  Thawnthu deuha sawiin, Mizo/Zomi te lo chhuahna chu 'CHHINLUNG' puk atanga lo chhuak an ni tih hi kan inchhui luh dan a ni a.  'Chhinlung' chu Hmar tawngin 'SINLUNG' an ti a, Paite leh Thahdo chuan 'KHUL' an ti ve thung a.  Sawi dan a dang hret tih mai loh chu a hmun leh a awm dan, Lei kua emaw, Puk emaw tihna a ni vek tho.

Khawvel ram leh sorkar hriat thama 'HNAM' tih tling chin chu hetiang hian sawi a ni thin: Hnam siper Sapin 'Clan, Sub-Clan' an tih infinkhawmin hnam tenau 'Tribe' an tih a siam a; Tribe hrang hrang infinkhawmin hnam lian 'NATION' a siam chauh a ni.  Mi dangin hnam 'Nation' tlinga min pawm ve theih nan Zohnahthlakte hi inthen hrang lova kan inzawmkhawm tlat a ngai a nih chu.  Chutichuan, hnama chiang tur chuan MIZO/ZOMI hnam kan nih theih nana thil pawimawh, insuihkhawm tlat hi a ni tih kan hriata kan pawm tlat leh inpumkhatna tichhe thei laka kan inven a tul tih kan hriat chian a ngai a ni.

MIZO tih leh ZOMI tih hi duh dan a inang lo deuh a.  Zomi tih duh zawkte chuan 'MI' tih chu mihring sawina a ni a, 'ZO' tih chu hmun emaw, ram emaw, hnam emaw hming sawina a ni a.  'Mi' hmaah 'Zo' tih hi dah tur zawk a ni.  India mi, English mi, German mi tih ang hi a ni mai, an ti ve tlat a.  A dik tho mai.  Dah hmasak tur leh a hnuhnung zawk tur thua ngaihdan chi hnih kan sawi mai a ni. A pawimawh ber chu thu thuhmun, a mihring thuhmun chiah bawk a ni tih hi a ni.

British-ho Mizoram leh Burma an luh tirhin mahnia ro lo rel thin, tuma thuhnuaia awm bik lo, lalte khan an lo do nasa hle a, tam tak an that a, anni lam pawhin an thih phah nasa bawk.  Ralthuam leh indo thiam sipai ngah zawk na na na chu hnehtu an ni ta a, sorkar dinin min awp bet ta hmiah mai a ni.  British-ho min awp tirha Mizorama Zohnahthlak hnam peng hrang hrang zingah Lusei hnam, Sapin Lushai tia an sawi leh ziak, chu a lian ber a.  A chhan chu Sailo lalte kha Lushai lal an intih vang a ni.  Hnam peng dang lian zualte pawh an hre vek bawk a, sorkar lehkha-ah an chhinchhiah a, chungte chu Lusei, Pawi, Lakher, Hmar, Paite, Ralte te an ni.  Thil an han hre chiang a, hnam peng hrang hrangte fun kima sawi nan LUSHAI tih chu tuna MIZO kan tih ang chiahin an lo hmang ta a ni.

ZO hnam kan nih dan (Identity) chu kan sawi chiang tawkah ngai ila. Paite chu Zo hnam peng zinga a lian deuh zinga mi a ni a.  Eng vanga Paite Union din tul ta nge tih hi sawi chian a thain a rinawm.  Zohnahthlak inzawmna leh inpumkhatna ngai pawimawh em em chungin, Zo hnam peng Paite hian mahni chhungkua bikah harsatna eng eng emaw kan nei a, chungte chu Zohnahthlak unau dangte nek leh tibuai chuang miah lova kan chin fel ve zel a ngai thin. Khawtlang nuam leh muanawm siam tur chuan chhungkua siamthat a ngai phawt ang hi a ni.  Chhungkua a that chuan khawtlang tha a lo awm a, khawtlang tha chuan ram nuam leh tha a siam leh a.

Zohnahthlak hnam peng zingah a tlangpuiin Paite hi a mawl leh changkang lo, rethei leh zakzum, inthlahrunga inkiltawih deuh chi kan ni a. Hruai harh kan ngai bik a, mi dangte tluk tur chuan tan fe a la ngai a, sorkar pawhin a bika a tanpui leh a ngaihsak a tul rih a.  Hmasawnna kawng leh eizawnna-ah te intodelh tura taima tak leh rinawm taka hna thawk tura infuih te pawh a la ngai nasa bawk.  Chu bakah lungrualna kan mamawh hle bawk. Mahni vanneihna tura mi dangte mitmei veng miah lova mahni duh dan dana khawsak mai te hian kan inlainatna leh inpumkhatna a tichhe thin.  Indawh tawn leh inhriat thiamna neih reng a ngai fo.  Tanpui ngai kal pelh loh hi thil tum ber pakhatah nei ila kan inzawmna a tha reng ang.  Dan hriatte a pawimawh a, hriat chauh ni lovin dan zawm leh thuawih hi a pawimawh em em a, inzirtir thin tur a ni. Dan khap thil leh mihring nun tichhe thei lakah kan fihlim a ngai. Kan eizawnna hi thianghlim se, hlawkna tur awm mah se kawng tha lo leh thianghlim lo chu kalsan ngam bawk ila. Kan zavaia kan that tlanna tur hi ngai pawimawh hmasa hram zel ila kan hlimin kan la hlawhtling ngei dawn a ni.

Mizoram pawna, Manipur leh Myanmar mi, Zohnahthlakte an awmna boruakin a zir loh avanga Mizoram rawn pante hi an khawngaihthlak thin a, theih ang anga lo tanpui hi kan bat a ni a.  Chutih rualin anni pawhin a hmuna chengte zai ngai thiam bawk sela. An harsa tih vanga thil dik lo tih an chin loh nan lo kaihhruai a tul bawk. Sorkar dan kalha thil an tih emaw, mipui tihrehawm leh tithlabar zawnga an chet emaw hian anmahni mai ni lo, hnam hmel thlengin an tibal thei thin.  Chhungkua inenkawlna fel tak neih a, inpawh tawn taka thil kan tih zel loh chuan hriat loh karin dinhmun chhe takah kan ding mai dawn a ni.

Kan sawi takte leh kan sawi kim loh thil dang avangin intihbikna rilru lam ni lovin, chhungkua kan invawn fel a tul tak meuh a. Kan harsatna leh mamawhte, thu chhia thu tha, eng pawh, kan thlen ngamna tur eng emaw chu kan neih a tul tih hriain Aizawla hnam vei mi kal khawmte chuan June 10, 2004 khan 'MIZORAM PAITE UNION' (MPU) an lo din ta a.  Hei hi Paite Inpui, mi tin ta a ni.  Inpui chu tlu chhe lova a din a, a thawh tur tha taka a thawh theih nan kan tawihawm a, kan belh tlat a, kan ven him a ngai a, chu hna chu kan zaa mawhphurhna a ni.  Thurawn petu tur leh a hmingchhiat vengtu tur kan ni theuh.  Inpui nghaktute hi mihring ve mai an ni tih hre reng ila.  An thatna te, an fin leh remhriatna te a famkim bik lo.  Mi pakhat ngaih dan leh duh dana kal mai lovin, eng thil pawh lo thleng se, sawi hova ngaihtuah tlan zel tur a ni a, lungrual tlanna zawng zelin hna a thawk dawn a ni.

MIZO PAITE CULTURAL SOCIETY:

Hnam nun leh zia, hnam tih dan bik kan neihte hi kan Hnam Culture a ni a. Culture hian min phuar khawm tha a, chhawm nun zel a pawimawh. Culture tha lo leh tangkai tawh lote erawh chu kan bansan thung ang.  Zohnahthlak hnam peng zingah culture nei tha pawl tak kan ni awm e.  Upa thufing (Paunak) tha tak tak a awm a, Hla tawng un leh ril tak tak te kan nei bawk. Hming sak dan pawh kawngkal nei tak a ni a, hming tawng ti mai ila, hman bik deuhte a awm fel thlap a ni.  Mipa hming leh hmeichhe hming sak dan pawh a hrangin a awm deuh.  Lam lamah pawh kan pi pute kha an lo duai lo hle.  Lam chi 30 vel lai awmin an sawi.  Chungte chu hnam zia tilangtu, mipui min hnuk khawmtu, tanrualna siamtu atana thil tangkai tak an ni. Duh lai lai chauh zir lovin, lam chi hrangte hi thiam tumin zir tak tak ila Mizo/Zomi culture timawitu leh tihausatu kan ni mai dawn a ni.  Thahnemngaih a tul khawp mai.

Thu leh Hla (Literature) lam pawh hi kan uar deuh deuh a pawimawh. Lehkhaa ziak a awm loh chuan nakin hun reiah chuan thu tha leh hla tha tam tak hriat kim loh emaw, hriat chhuah theih tawh loh emaw a awm teuh mai dawn a. Kan thil hriat tha leh thangthar ten an mamawh tur ang chi thil reng reng chu ziakin kan dah thap tur a ni ang.  Literature lama hausak hi hnam puitling entirna a ni.  Tuna kan awm ang hi chuan Mizoram chhunga cheng Paite mi ringawt tan chuan a huphurhawm mai thei.  Mahse Manipur leh Myanmar lama unaute nen inthlunzawmna tha tak neiin, anni kaihhruainain hmasawn dan kawng a awm ngei ang.

'MIZORAM PAITE CULTURAL SOCIETY' hi March 4, 1982 khan din a ni tawh a, Sorkar-ah registered thlap a ni.  Cultural Society tangkaizia sawi tur a tam hle.  A rah chhuah hmasa ber pawl chu inhre ngai lote kan inhriat phah a, inhriat mai ni lo, innelna leh inlainat tawnna a siam a, tanrualna tha zawk a lo awm ta.  Mahni nihna lo hre chiang lo leh inzahpui thinte pawh a kai harh nasa hle bawk.  Chapchar Kut te, Republic Day te leh hun pawimawh bikah te Paite culture, lam leh hlate pho chhuah a ni ta a, kan nihna dik tak miten an hriat phah hle a ni.  Paite puan phei chu mawi ti an tam khawp mai.  A lar phah hle reng a ni.

Hnam culture zinga pawimawh tak incheina, kawr, pawnfen, lukhum, pangpar tawn leh thil dang pawh Tedim leh hmun remchang apianga mi lak khawm a ni a. Khuang dik tak, sawl petpawt te, darkhuang leh darbu te, Cultural Show-a hman tur pawimawhte chu lak khawm a ni.  Thangtharte tan chuan hmuhnawm leh zir tham tak an ni. Literature lamah pawh lehkhabu tangkai tak tak Manipur lam hotuten min pe a, chu bakah Tedim atangin eng emaw zat lak a ni bawk.  A tir lam khan Tedim pa, hmanlai leh hnam ziarang chanchin hre tak thla khat vel lai cham tura chah thlak a ni a, amah atangin thil tam tak kan hriat belh a ni.

Cultural Society chanchin kan sawi laiin lungchhiatthlak tak pakhat sawi loh theih a ni lo.  President hmasa ber Pu S.B. Piangsiandong kha Art & Culture Departmenta Fine Arts Instructor a ni a.  A va tangkaiin a va duhawm thin em! A phur mai ni lovin thil tih dan tur a hre tlat.  Kan hmasawnna bul pawh amah kha a ni.  Bul kan tan fuh tehreng nen, min peih lohsan ta thut mai. A awm loh chu Cultural Society-in a tuar ber kan ti thei ang. A fate leh a lainaten lo hre thiam sela. Kan ui em a ni. A pawi tak tak a ni. A awm loh hnuah chuan Mizoram Paite Cultural Society (MPCS) pawh a thi ve tep chu a ni e.  Champhai lamah erawh chuan a lo la nung tha viau a, a lawmawm tak tak a ni.

Cultural Society pawimawhzia hriain Aizawla hnam veitute kal khawmin din thar leh dan an ngaihtuah a.  MPU din a lo ni ta bawk a, an kengkawh tel ta a.  Culture thil bik ngaihtuahtu tur mi tlawmngai leh inpe takte ruat felin, chung hruaitute chuan hna an thawk leh ta char char a, vawiin hun pawimawh hi kan thleng thei ta a ni.  A lawmawmin a thlamuanthlak ta.  Cultural Meet hlawhtling taka kan hman theih nan NEC Secretary Pu H.V.Lalringan pawisa kan mamawh dan hriain min pe tlat mai le.  Cultural Society hruaitute thahnemngaihna hi fak tlak a ni a, pawisa ihe lova min tumsaktu Pu Ringa chungah MPU leh MPCS hmingin lawmthu ka sawi e. He Cultural Meet (festival) tihlawhtling tura inbuatsaiha lo kal zawng zawng chungah lawmthu ka sawi bawk a ni.

MPU kalphung leh a hna thawh dan tur sawi leh lawk ila. MPU chu hna thawk phut phut tur a ni lova.  Boruak thlir reng chungin a tul dan anga thawk thin tur a ni.  Mipui hnena thupuan leh thuchah pawimawh siam te, hmasawnna ngaihtuah te, mimal leh Pawl mamawh ngaihtuahpui leh an harsatna-a lo tanpui te, Sorkar leh Pawl hotute a tul dan ang anga dawr te, inpumkhatna leh tanrualna ngaih pawimawh te, thil tha lo leh duhawm lo laka hnam ven hna te, heng thil leh sawi lawk vek theih loh thil lo thlengte uluk taka ngaihtuahtu tur a ni. Mi mal leh Pawl hrang hrangte insuihkhawmna Inpui a ni a, hnam pum khawih thil eng pawh a ngaihtuahin a buaipui thin dawn a ni.  Mi tinin a kut tichak tura kan finna leh remhriatna te, sum leh pai leh tha leh zung kan thawh hnial loh a pawimawh.  A tungdingtu tur kan ni theuh a, a lehlamah a tichhetu kan nih theih bawk si avangin neitu rilru tak tak pua kan enkawl a pawimawh reng dawn a ni.  A tawp berah chuan MPU hian Zohnahthlak zawng zawng inpumkhatna leh tanrualna atan theihtawp a chhuah dawn a ni.  MIZO/ZOMI hnam hi khawvel hriata a lo awm ve theihna tur hi a ngai pawimawh hle a ni.

He inkhawmpui pawimawh tak hi a hlawhtlin ngei duha theihtawp lo chhuaha, zo taka thlengtu Champhai MPU Zonal Headquarters hotute leh Cultural Society hruaitute leh mipui an inpekzawhzia kan hmuhin kan lawm tak meuh a, kan zaa aiawhin lawmthu ka sawi e.

MPU leh MPCS dam reng rawh se.

.