ZOGAM LAPI DING TAWH KISAI

- J. Thang Lian Pau (2002)
 
 


Zomite in Minam Lapi kip i nei  nai kei hi.   Ahi zongin minam lapi zah banga i zat a hunhunin hong kikhel toto hi.  Tua pen minam kikhopnate-ah i la teelte pan ahih kei leh i sak mun pente panin kilang hi.  Minam lapi dana lak theih ding la li teelkhiat ding hi leh a pian masak dan kizomin a nuaia teng teelhuai pen kha ding hi.

 

A masa pen in, Zo lapi awkaih-a kisa 'Tun sung khat Pan' cih la hi in, hih la pen Kawlgam Vaigam Zomi a neu a lian in a theih leh a sak theih hi a, minam lapi cih theih ding zah li lakah a piang masa pen leh a minthang masa pen khat hi.  Tuni dong ciangin nungta mahmah hi.

 

                      Tuun Sung Khat Pan

A.  Ei teng khawlkhawm a tuam omlo, Zomi ci peuh, Khula piang

      Tuunsung khat pan piang hi ngeingei e

 

B.  Tunsung khata piang hi ngeingei

      Suahpih sanggam, Laigui zomkhawm (te hi ngeingei ee)2

A nihna pen Pu H. Jelshyam, IAS in a phuah "Sinin Semin Jun'n" cih la hi a, hih pen Siamsin Pawlpi (SSPP) Lapi-in kizang in, India gam Zomite lakah hih la pen thang mahmah hi.  Hih la pen minam khawmpi khat peuhpeuh ah sak loh phamawh in kingaihsun hi.   Minam lapi cih theih ding zah li lakah a piang a nihna hi kha ding hi.

           Sinin Semin Jun'n
 

I tun leh jua lungmawlin,
Pianna gam gia bang jun di'n,
Sen vontawite hon ngak uh,
Sinin Semin gia bang jun'n.
 

Dial dialin, Diam diam le'ng lawm2
Vualzawlna i gamlei' di'n.
 

Tua bang dinga min bang piang,
Namchih mi zatam laiah,
Ki-itna leh kituahna,
Kumtawnin om gige hen.

Sum-le-pai lam tam sangin,
Sakmin hoih manpha zaw e,
Lawmvual liangvai panpihin,
Na min lawi bang hong thang ding.

Khaile ! lawm aw ma suan ni,
Lungke louin pang ve ni,
I tunnu juapa gamlei,
Noplenna gam hong suak ding.

 

A thumna ah, Vum Nang sak "Tuun Sung Khat Pan"  cih la hi in, hih la pen tulai takin  minam lapi cih theih ding zah li lakah a minthang pen hi lai ding hi.  Minam khawmpite ah kisapi pen lai hi.  Kawlgam Vaigam Zomite in kithei tuak hi.  Hih la pen tam veipi tak kipuah phapha zel hi.

 

                    Tuun Sung Khat Pan

Sakmi khangmi kikhen loin

Mimbang pianna Ciimtui vangkhua

I heina pianin dang zong leh

Sinlai pai tembang kuah ciat ve ni

 

Ziin in khen maw!  Sianmang khen maw!

Sinlai ah na sa'ng e

Gibang khen zong lungah kingilh kei ni

Tunsung khat pan piang hi ngeingei hang e

 

Sinthu tuibang luangkhawm den ni

Zogam Tunnu paal lawh nading

Cik ciang mel in kong mu thei diam

Tunnu aw mubang hong ngai ung e

 

Sinthu tuibang luangkhawm den ding

Kawlgam Vaigam gibang khen zong

Tu in tuibang gawmlo mah leng

Zogamah tuibang kigawm nawn ding

 

Ka sinlai kuai Taang ka lungtup

Heisabang hong paal ding hi ta

Singta lungdeih Zogam zaang Ni

Lenmualah hong suak cialcial ta e

 

A lina cih dingin Thawn Kham la "Zogam "  kilawm pen kha ding hi.  Hih la pen Minam Lapi cih taak pen ahih hangin a pian zawh a sawt nai loh mah bangin mikim in kiza kithei nai lo hi.  Ahi zongin a za peuhpeuhte lungsim pen bun mahmah hi.   Tua ahih manin hih la in minam lapi cih theih ding la dangte melh-tohtoh  tuak in, Zomi sungah dinmun sang hong luah toto ding tawh kibang hi.  Tua ahih manin hih pen a kheng zo ding dang a om ma, tu ciangciang adingin Minam Lapi dinga kilawm pen khat hi phot hi.  A kuama peuhin siam leng hoih ding hi.

                ZOGAM

 

Zogam tuan pupa luahna gam,

Zogam khangsawnte luahna gam;
Zogam mualdawn lenmui kai ee,

Neisok pak san silsial;
Zogam ton leh lamna Zogam,

Zogam gal leh sa aihna gam;
Zogam ningzu khuaizu bang khum,

Lenkhuang tawi zaila awi;
Pu leh pa lenna gam.

Kawlgam Vaigam ka zin zongin,
Kawl ann ne, mang innsung ka om zongin;
Zogam Zo inn mah lunggulh ing,
Zo ngeina mah deih ing;
Zogam zalmang in hong man ing,
Zogam mu bang ken hong ngai veng,
Itna damtui a luanna gam,
Beh leh phung tenna gam;
U leh nau kicin na.
 

Zogam aw ken hong taisan kei ning,
Zogam aw na kha nuai hong sel aw;
Ka lamkiatna, ka lungtang phum nang Zogam,
Kong it hi Zogam aw.
 

Zogam miten hong neu et in,
Zogam na miten hong taisan maw;
Zogam gilkial dangtak in thuum,
khutzep in en ding maw.
Zogam ton leh laam hong lak in,
Zogam na zaila hong awi ve;
Zogam na ningzu hong lup in,
Na ngeina a luite,
Ko hong lakkik dih aw.

Zogam Zomi khantoh nading,
Pilna siamna leh neih leh lam;
Lungsim pumpi khua-ul sisan,
Piakkhiatna tawh sem ni;
Kawlgam vaigam a Zomite,
A nei a lam Zomi te’n
Mualdawn Zomite kahna aw,
Nu leh pa tauna aw,
Hong huh hong ciah un ci.

Hih banga minam lapi cih theih ding la li hong kisuangte pen a kilawm pen, a hoih pen cihna hi lo hi.  Hih la lite sanga a hoih zaw leh a kilawmzaw la dang tampi tak om ding hi.  Ahi zongin minam la cih dinga a kilawm khat pen mipi in a zat khol kei leh mipi lungsim bun zolo cihna suak a; a hoih kei phialzaw zongin mipi in a zatzat khat pen minam lapi cih theih hong hi zaw veve hi.  Tua mah bangin minam lapi a kici, ahih hang mipi in a phawk khol loh khat pen Chin State, Zomi Baptist Church (ZBC) la bu sunga  om "Zogam Lapi" ahi hi.  En mah dih leng:
 
                   ZOGAM LAPI
Word: Rev. Tuan Khan Mung
Tune: G. Biak Nawl

Tuana pupa lamtual saina
Khawhlo phungpha tonkhuang saina
Lungdeih sinthu khaubang sutna
Phuhbang kho hen, Pianna Zogam (Zogam)
Sianmang lumsun, lungtuak vontawi
Sian sinthu tawh mawngbang kikawi
Nun nuam kisung, lungtuak zai-awi
Sian in siam hen, Pianna Zogam (Zogam)

Tuan pupa mabang i zopna
Siamsil min lian tuang i tutna
Tongdam siktui zubang khumna
Kilbang khang hen, Pianna Zogam (Zogam)

Aw Zogam nun nuam huihdam semna
Milun zata laitual lenna
Lungtuak momno ngabang lenna
Lawibang thang hen, Pianna Zogam (Zogam).

Hih hong kiteelkhia la ngate pen mi tuamtuamte' ngaihsutna tawh kituak lo, ahih kei leh minam lapi dinga hi thei sak loh late hi kha ding hi.  Tua pen kuamah mawhsiat theih a hi kei hi.  Minam lapi bawl dingin seh tuam mi a om hi lo hi.   La thak hong piangte lak pan a kilawm pen peuhpeuh in Minam Lapi hihna hong luah toto ding hi. //